काठमाडौं । स्वास्थ्य क्षेत्रको सबैभन्दा ठूलो चुनौति बनेर उभिएको कोरोना भाइरस ‘कोभिड – १९’ को कारण रोजगारी गुमाएर तनावमा पर्नुभएको छ ? वा गरिरहेको कार्यक्षेत्र परिवर्तन गर्न चाहनुभएको छ ? विदेशबाट फर्केर नेपालमा नै कुनै इलम गर्ने सोंचमा पो हुनुहुन्छ कि ? यदी त्यसो हो भने अब धन्दा नमान्नुहोस्  ! हेटौँडा सिमेन्टले करिब ३८ हजार बढी कामदारको माग गरेको छ ।

आज (आइतबार) एक सूचना जारी गर्दै हेटौंडा सिमेन्टले ३८ हजार ६ सय ९५ जना कामदारको माग गरेको हो ।

यसमध्ये २ हजार ९ सय २० जना दक्ष र ३५ हजार ५ सय ७५ जना अदक्ष कामदार आवश्यक भएको हेटौँडा सिमेन्टद्वारा जारी गरिएको सूचनामा उल्लेख छ । सूचनामा जनाइएअनुसार सो कामदारको आपूर्ति आउटसोर्सिङ मार्फत् गर्ने भन्दै यसका लागि ३० दिनको अवधिभित्र इच्छुक आपूर्तिकर्तालाई बोलपत्र पेश गर्न आह्वान समेत गरेको गरिएको छ ।

एक वर्षभित्र ३८ हजार कार्यदिनका लागि काम गर्ने कामदारको आपूर्ति गर्न लागिएको सिमेन्टका महाप्रबन्धक प्रेमशंकर सिंहले जानकारी दिए ।
सो सूचनाका सम्बन्धमा अन्य विभिन्न जानकारी लागि कम्पनिको वेवसाईटमा हेर्न वा सम्पर्क गरेर जानकारी लिन भनिएको छ ।