मधेशटप डेस्क,
बिरगंज : बंगलादेशबाट खरीद गरिएको ३२ हजार ५०० मेट्रिकटन युरिया मल नेपाल आइपुगेको छ ।
सरकार–सरकार बीच मार्फत रासायनिक मल खरीद सम्झौता अनुसार कृषि सामग्री कम्पनी लिमिटेड प्रादेशिक कार्यालय बीरगन्जमा साे परिमाणका युरिया मल आइपुगेको हो ।
जिटुजी सम्झौता अनुसार बंगलादेश सरकारले नेपाल सरकारलाई ५० हजार मेट्रिकटन युरिया मल उपलब्ध गराउनेछ । तीमध्ये बाँकी रहेको १७ हजार ५०० मेट्रिकटन युरिया मल आउने क्रममा रहेको सो कार्यालयका प्रवन्धक गोरखनाथ केसीले बताए।
बाँकी रहेको मल कोलकाता बन्दरगाहको बाटो गरी रेलमार्गवाट बीरगन्जकाे सिर्सियास्थित सुख्खाबन्दरगाह भन्सार कार्यालयमा आउने छ ।
सम्झौता अनुसार हालसम्म नेपाल सरकारले सबै मल प्राप्त गरी सक्नु पर्नेमा अहिले विश्वव्यापी रुपमा फैलिएको कोरोना सङ्क्रमणका कारण सबै क्षेत्र प्रभावित भएकाले बाँकी मल आउन ढिलाई भएको प्रवन्धक केसीले बताए ।
उनका अनुसार बाँकी रहेका मल छिटै नै उपलब्ध गराउन नेपाल सरकार तथा बंगलादेशस्थित नेपाली दूतावासले प्रयास गरिरहेको छ । नेपाल सरकारले धानको सिजनमा मलको अभाव हुन नदिन बंगलादेशबाट ५० हजार मेट्रिकटन मल ल्याउन लागेको हो ।
कृषि सामग्री कम्पनी लिमिटेड प्रादेशिक कार्यालय बीरगन्जमा अहिले युरिया मल २ हजार ७०० मेट्रिकटन, डिएपी १ हजार ४०२ मेट्रिकटन र पोटास १ हजार २८० मेट्रिकटन मौज्दात अवस्थामा रहेको छ । मौज्दात रहेको उक्त मलले पहिलो चरणको धान खेतीका लागि पर्याप्त हुने देखिन्छ । पर्सा जिल्लास्थित १३१ ओटा थोक विक्रेतामार्फत सो मल किसानसम्म पुग्ने गरिन्छ ।
सो कार्यालयले थोक विक्रेतालाई एक पटकमा १३० बोरासम्म मल दिने गरेको छ । विक्रेताहरुले स्थानीय तहले तोकेको मूल्यमा किसानहरुलाई मल विक्री गर्ने गरेका छन् । कतिपय विक्रेताले किसानसंग तोकेको मूल्यभन्दा बढी मूल्य लिएर मल विक्री गर्ने गरेको गुनासो समेत आउन थालेपछि सम्बन्धित स्थानीय तहले त्यस्ता कालोबजारी गर्ने थोक विक्रेतालाई कारवाही गर्नुपर्ने माग किसानको छ ।
पर्सामा ९० प्रतिशत किसानले धान खेती गर्दै आएका छन् । पर्सामा कुल ४६ हजार हेक्टर क्षेत्रफलमा धान खेती हुदै आएको छ ।
Discussion about this post