मधेशटप डेस्क, फागुन १८गते ।

कोल्हवी ; बाराको कोल्हवी नगरपालिका स्थित वडामा कार्यरत एक कर्मचारीमाथि विशेष अदालतमा आरोप पत्र दायर गरिएको छ ।

नायब सुब्बा विनोद प्रसाद साहविरुद्ध विशेष अदालत काठमाडौँमा आरोप पत्र दायर भएको हो ।

कोल्हवी नगरपालिका वडा नम्बर ११ को वडा कार्यालयमा कार्यरत वडा सचिव साहविरुद्ध अख्तियार दुरुपयोग अनुसन्धान आयोगले अदालतमा भ्रष्टाचार मुद्दा दायर गरेको जनाएको छ ।

अनुसन्धानको क्रममा कर्मचारी साहले सेवाग्राहीसँग घुस लिएको पुष्टि भएको भन्दै विशेष अदालतमा आरोप–पत्र दायर गरेको प्रवक्ता श्याम प्रसाद भण्डारीले जनाएका छन् ।

आरोपित साहले जग्गा नामसारी सिफारिसका लागि सेवाग्राहीसँग घुस माग गरिरहेको भन्ने सूचना एवं उजुरीका आधारमा हेटौडा स्थित आयोगबाट खटेको एक टोलीले उनलाई सेवाग्राहीबाट ३ हजार ५ सय रुपैयाँ घुस लिइसकेको अवस्थामा गत माघ २० गते नियन्त्रणमा लिएको थियो ।

अनुसन्धानको सिलसिलामा आरोपित साहले जग्गा नामसारी सिफारिस गरिदिने प्रयोजनार्थ सेवाग्राहीसँग उक्त रकम लिएको खुल्न आएको प्रवक्ता भण्डारीले जनाइएकाृ छ ।

भ्रष्टाचार निवारण ऐन, २०५९ को दफा ३ को उपदफा १० को कसुर भएकोले आरोपित साहलाई बिगो ३ हजार ५ सय रुपैयाँ कायम गरी भ्रष्टाचार निवारण ऐन, २०५९ को दफा ३ को उपदफा १० र दफा ३ को खण्ड क बमोजिम सजायको माग गरिएको जनाइएको छन ।