राजविराज: नेपाल भारत बीचको सम्बन्ध दशकौंदेखी चलिआएकोले यो सम्बन्ध अझ प्रगाढ हुनुपर्ने एक कार्यक्रमका वक्ताहरुले जोड दिएका छन् ।

राष्ट्रिय एकता अभियान सप्तरीले शनिबार राजविराजमा आयोजना गरेको “विकास क्षेत्रमा नेपाल भारत सहयोग” विषयक विचार गोष्ठीका वक्ताहरुले सो कुरामा जोड दिएका हुन् ।

आयोजित गोष्ठीमा नेपालका विभिन्न जिल्लाहरुमा भारत सरकारले गरिरहेको विभिन्न सहयोग स्वागत योग्य रहेको भन्दै वक्ताहरुले यस्ता सहयोग आगामी दिनहरुमा निरन्तर रहने विश्वास समेत व्यक्त गरे ।

उनीहरुले भारत सरकारले नेपालको शिक्षा, स्वास्थ्य लगायतका क्षेत्रमा निरन्तर सहयोग गरिरहेको स्मरण गराउँदै यस्ता सहयोगले मुलुकको विकासमा ठेवा पुगेको उल्लेख गरे ।

नेपालको भारतसँग पारिवारिक सम्बन्ध, व्यापारीक सम्बन्ध, धार्मिक सम्बन्ध समेत सदिऔंदेखी जोडिएकाले यस्ता सम्बन्धलाई अझ प्रगाढ गर्न सबैले आ–आफ्नो क्षेत्रबाट सकारात्मक भूमिका खेल्नु पर्ने वक्ताहरुले जिकिर गरे ।

राष्ट्रिय एकता अभियान सप्तरी संयोजक सुनिता चौधरीको अध्यक्षता, नेपाली काँग्रेसका जिल्ला उपसभापति रामकुमार यादवको प्रमुख आतिथ्य तथा अभियानकी केन्द्रिय उपाध्यक्ष सुनिता साहको विशिष्ठ आतिथ्यमा आयोजित विचार गोष्ठीमा हरिदेव राम, राहुल रजक, प्रमिला साह, प्रविण बानु, डम्बर नारायण साह, यूवा नेता दिपेन्द्र चौधरी, बरिष्ठ पत्रकार अनिल कुमार अनल, पत्रकार दिनानाथ यादव, पूर्वप्रअ नथुनी दास, किरण कुमारी राय, अर्जुन कुमार यादव लगायतले नेपाल भारतबीचको सम्बन्ध र नेपालको विकासमा भारतले पु¥याइरहेको योगदान बारे चर्चा गरेका थिए ।

सोही गोष्ठीमा अभियानका सल्लाहकार सागरविर कडारीले नेपाल भारत सहकार्य सम्बन्धी दस्तावेज प्रस्तुत गरेका थिए ।