आत्महत्याको घटना वृद्धि

ध्रुब कुमार झा

जनकपुरधाम । धनुषा जिल्लामा प्रत्येक एक महिनामा १३ जना भन्दा बढी व्यक्तिले आत्महत्या गर्ने गरेको देखिएको छ ।

जिल्ला प्रहरी कार्यालय धनुषाकाअनुसार चालु आर्थिक वर्षको बैशाख मसान्तसम्म १० महिनामा १ सय २४ जनाले आत्महत्या गरेको छ ।

सो मध्ये १ सय ६ जनाले भुण्डिएर र १८ जनाले विषसेवन गरी आत्महत्या गरेको जिल्ला प्रहरी कार्यालय धनुषाका सूचना अधिकारी वेद प्रसाद गौत्तमले जानकारी दिए ।

उनका अनुसार आ.व. २०७८/०७९ मा १ सय ४५ जनाले आत्महत्या गरेका छन् ।

सो मध्ये १ सय १८ जनाले भुण्डिएर,२६ जनाले विषसेवन तथा एक जनाले आगोलगाएर आत्महत्या गरेको तथ्यांकले देखाएको छ ।

विगत तीन वर्षको तथ्याँक हेर्ने हो भने ४ सय ४२ जनाले आत्महत्या गरेका छन् ।

यता मधेश प्रदेशको आठ वटै जिल्लामा भने १ हजार भन्दा बढी व्यक्तिले आत्महत्या गरेको प्रहरीको तथ्याँकमा उल्लेख छ ।

विश्व स्वास्थ्य संगठनले नेपाल जस्ता कम तथा मध्यम आय भएका देशहरूमा आत्महत्याको घटना बढी हुने गरेको बताउँंदै आएको छ ।

मानसिक तनाव, आर्थिक असूरक्षा,वैदेशिक रोजगारी लगायतका विभिन्न कारणहरुले आत्महत्या गर्नेहरुको संख्या बढेको डिएसपी गौत्तम बताउँछन् ।

खासगरी युवाहरुमा भविष्यप्रतिको निराशा, वैवाहिक सम्बन्धमा आएको समस्या, जनचेतनाको अभावले गर्दा पनि आत्महत्याको घटना हुने गरेको उनले स्पष्ट पारे ।

‘आत्महत्यामा दुरुत्साहन गरेको भन्दै कानूनमै सजायको व्यवस्था भए पनि थोरै घटनामा मुद्दा दर्ता हुने गरेको छ ।’

उनले भने,‘धनुषा जिल्लाकै कुरा गर्ने हो भने विगत तीन वर्षको अवधिमा आत्महत्या दुरुत्साहनको पाँच वटा मुद्दा मात्रै परेको छ।’

अधिक आत्महत्याको घट्ना सामाजिक सुरक्षाको अभावकै कारण हुने गरेको मनोचिकित्सकहरु बताउँछन् ।

एक तथ्यांक अनुसार देशभर दुई सयको हाराहारीमा मनोचिकित्सक रहे पनि सरकारी अस्पतालहरूमा जम्मा एक दर्जनले सेवा दिइरहेको र त्यो पनि राजधानी काठमाण्डु केन्द्रित नै रहेको पाइएको छ ।