काठमाडौं । सरकारले नागरिक उन्मुक्ति पार्टीका संरक्षक तथा पूर्वसांसद रेशम चौधरीको बाँकी कैद सजाय माफी गर्ने तयारी थालेको छ । चौधरीको सजाय माफीका लागि फाइल राष्ट्रपति कार्यालयमा पुगिसकेको छ ।
उनलाई जेठ १५ गते गणतन्त्र दिवसको अवसरमा राष्ट्रपतिमार्फत सजाय माफी गराउने तयारी भइरहेको हो । राष्ट्रपति रामचन्द्र पौडेलले गणतन्त्र दिवसका अवसरमा माफी दिएमा चौधरी जेलमुक्त हुनेछन् ।
२०७२ साल भदौ महिनामा कैलालीको टीकापुरमा ७ जना सुरक्षाकर्मी र एक नाबालकको मृत्यु हुने गरी भएको हिंसात्मक घटनामा दोषी ठहर भई चौधरी जन्मकैदको सजाय पाएर अहिले डिल्लीबजार कारागारमा छन् ।
राष्ट्रपति कार्यालय स्रोतका अनुसार उनको बाँकी सजाय माफी हुनुपर्ने भनी पेस भएको निवेदन गृह मन्त्रालयबाट शीतलनिवास पुगेको छ । त्यस विषयमा राष्ट्रपतिसँग छलफल गर्न मंगलबार प्रधानमन्त्री पुष्पकमल दाहाल र उनको टिम राष्ट्रपति कार्यालय पुगेको थियो ।
गृह मन्त्रालयले मुलुकी फौजदारी कार्यविधि संहिता ऐन, २०७४ अनुसार सजाय माफीको प्रक्रिया अघि बढाएर फाइल राष्ट्रपति कार्यालयमा पठाएको हो । ऐनको दफा १५९ मा अदालतको फैसला बमोजिम सजाय पाएको व्यक्तिले माफी पाउन, मुल्तवी राख्न, परिवर्तन वा कम गर्न गृह मन्त्रालय मार्फत राष्ट्रपतिलाई निवेदन दिनसक्ने व्यवस्था छ ।
संविधानको धारा २७६ मा राष्ट्रपतिले कुनै अदालत, न्यायिक वा अर्धन्यायिक निकाय वा प्रशासकीय पदाधिकारी वा निकायले गरेको सजायलाई कानुनबमोजिम माफी, मुल्तवी, परिवर्तन वा कम गर्न सक्ने व्यवस्था छ ।
Discussion about this post