आर्थिक मन्दीका कारण साना उद्योग बन्द हुँदै

जनकपुरधाम । आर्थिक मन्दीको प्रभाव घरेलु तथा साना उद्योगमा पनि परेको छ ।

आर्थिक वर्ष ०७९÷०८० मा आर्थिक मन्दीका कारण धनुषामा ७१ वटा घरेलु तथा साना उद्योग बन्द भएका छन् ।

घरेलु तथा साना उद्योग कार्यालय धनुषाको कारण गत आर्थिक वर्षमा लघु उद्योगतर्फ २८, साना उद्योग तर्फ ४२ र घरेलु उद्योगतर्फ १ गरी ७१ वटा उद्योगहरु बन्द भएको छ ।

कार्यालयमा गएर आधिकारिक रुपमा उद्योग बन्द गराउनेको संख्या कम रहे पनि नवीकरण गर्न नसकेका ७१ वटा उद्योग खारेजीमा परेको घरेलु तथा साना उद्योग कार्यालयका सूचना अधिकारी मुकेश कुमार कर्णले जानकारी दिएका छन् ।

कोभिड १९ को असर, बैंकको ब्याजदरमा वृद्धि हुनु, आर्थिक तरलता जस्ता कारण देखाउँदै उद्योग तथा वाणिज्यतर्फका फर्महरु बन्द हुने क्रम बढ्दै गएको उनले बताए ।

धनुषा जिल्लामा साना उद्योग दर्ता ५७६ र घरेलु उद्योग गरी एक हजार ५७ उद्योग सञ्चालनमा रहेका छन् ।

हाल १७ हजार ५ सय उद्योग सञ्चालनमा रहेको छ । सो कार्यालयले सोही आर्थिक वर्षमा उद्योगतर्फ रु ४४ लाख ७५ हजार ३ सय ७५ र वाणिज्यतर्फ रु ७४ लाख २३ हजार ३ सय २५ गरी जम्मा रु १ करोड १९ लाख ९८ हजार ७ सय नवीकरण लगत कट्टा प्रतिलिपि वापत सो रकम उठाएको नासु मुकेश कर्णले बताए ।

यसैगरी, व्यवसायी बन्द भएपछि अहिले जनकपुरधाममा व्यवसायिक सटरहरु खाली गरी व्यापारी अन्यत्र पलायन भएको छ ।

यी घरेलु तथा साना उद्योगहरु बन्द हुँदा करीब ५ हजार कामदार बेरोजगार भएको सूचना अधिकारी कर्णले बताए ।

त्यसैगरी, उत्पादनमूलक कृषिजन्य, वनजन्य र सेवामूलक उद्योगहरु बन्द हुँदा राजस्व प्रभावित नाकारात्मक प्रभाव परेको उनले बताए ।