जनकपुरधाम । मधेश प्रदेशको राजधानी जनकपुरधाममा प्रादेशिक बायोमेडिकल व्यवस्थापन इकाइ संचालनमा आएको छ ।
प्रदेश स्वास्थ्य आपूर्ति व्यवस्थापन केन्द्र जनकपुरधामको आयोजना तथा निक साइमन्स इन्स्टिच्यूटको आर्थिक तथा प्राविधिक सहयोगमा प्रादेशिक वायामेडिकल व्यवस्थापन इकाई संचालनमा आएको हो ।
उक्त इकाईको उद्घाटन मधेशप्रदेशका स्वास्थ्य मन्त्री शत्रुधन प्रसाद सिंहले गरेका छन् ।
मधेस स्वास्थ्य विज्ञान प्रतिष्ठान, जनकपुरधाम, मुजेलियामा बायोमेडिकल व्यवस्थापना इकाइको उद्घाटन गर्दै मन्त्री सिंहले स्वास्थ्य सेवा प्रणालीलाई गुणस्तरिय बनाउन बायोमेडिकल व्यवस्थापना इकाइले ठूलो सहयोग पुर्याउने बताए ।
प्रादेशिक बायोमेडिकल व्यवस्थापन इकाइले स्वास्थ्य सेवा प्रणालीलाई थप सुदृढ र प्रभावकारी बनाउने मन्त्री सिंहले उनले बताए ।
‘यो इकाइले प्रदेशभित्र रहेका अस्पताल, जनस्वास्थ्य कार्यालय र अन्य स्वास्थ्य संस्थाहरूमा प्रयोग हुने चिकित्सा उपकरणको मर्मत, व्यवस्थापन, र क्यालिब्रेसनमा आवश्यक सहयोग गर्छ,।’ गुणस्तरीय स्वास्थ्य सेवाको प्रवद्धनमा पनि सहयोग पुग्ने मन्त्री सिंहले विश्वास व्यक्त गरे ।
‘चिकित्सा उपकरणहरुको प्रभावकारी व्यवस्थापनले रोग निदान र उपचारको प्रक्रियालाई गुणस्तरिय बनाउँछ ।
यसले बिरामीहरुलाई सही समयमा उपचार प्राप्त गर्न मद्दत पुर्याउँछ,’ मन्त्री सिंहले भने । प्रदेश स्वास्थ्य आपूर्ति व्यवस्थापन केन्द्र, जनकपुरधाम सँग सहकार्य गरी निक साइमन्स संस्थानले मधेश प्रदेशमा प्रादेशिक बायोमेडिकल व्यवस्थापना इकाइ स्थापना गरेको हो ।
इकाईमा प्रदेशभित्र रहेका स्वास्थ्य संस्थाहरुमा प्रयोग गरिने बायोमेडिकल उपकरणहरूको मर्मत, सम्भार र जाँच गरी मर्मत चक्रलाई सुनिश्चित गर्नुका साथै बायोमेडिकल उपकरणहरूको उचित व्यवस्थापन गरिनेछ ।
प्रदेशभित्र रहेका अस्पतालहरुका बायोमेडिकल उपकरणहरूको मर्मतका लागि उचित व्यवस्थापन प्रणाली सुनिश्चित गर्ने, अस्पतालमा रहेका बायोमेडिकल उपकरणको मर्मत सम्भार न्यूनतम समयमा गर्ने, लागत प्रभावी मर्मत रणनीति लागू गर्न, दक्ष प्रविधिक कर्मचारीहरूबाट चिकित्सा उपकरणहरूको सुरक्षित सञ्चालनलाई बढावा दिईने निर्देशक डा सुनिल प्रसाद कुशवाहाले बताए ।
उपकरणहरूको सही व्यवस्थापन र मर्मतले स्वास्थ्य सेवा प्रदायकहरूको दक्षता बढाउनुका साथै बिरामीहरूको उपचार प्रक्रियालाई सहज र प्रभावकारी बनाउनेछ ।
