जनकपुरधाम । जनकपुरधामको सबैभन्दा ठूलो समस्या मध्येको एक अव्यस्थित फुटपाथलाई खालि गराउने काम सुरु गरिएको छ ।

शुक्रवार बिहान १० बजेदेखि नगर प्रहरीको टोलीले फुटपाथ खालि गर्न माईकिंग फुटपाथमा राखिएको समान व्यापारीहरुलाई आफ्नो सटर भित्र राख्न आग्रह गरिरहेको छ ।

जनकपुरधामको रेल्वे स्टेशनदेखि सुरु भएको फुटपाथ खालि गराउने काम भानुचोकसम्म गरिएको थियो । त्यसपछि केहि बेर वर्षाको कारण रोकिएको थियो भने पुनः अभियान जारी गरिएको जानकारी जउनपाका नगर प्रहरी प्रमुख नितेश रायले बताए । यहाँका फुटपाथ सोही स्थानमा सटरमा व्यापार गर्नेहरुले नै कब्जा गरेका छन् । अधिकाँश पसलेहरु फुटपाथको चरम दुरुपयोग गर्ने गरेको देखिए पछि यो अभियान सुरु गरिएको उनले बताए ।

स्टेशनचोकमा रहेको केहि व्यापारीहरुले समान हटाउन अटेरी गरेको गुनासो समेत प्रमुख रायले पोखेका छन् । कुनै पनि नगरको सौन्दर्य तथा पैदल यात्रीहरुको सुरक्षित यात्राकालागि फुटपाथको निर्माण गरिएको भए पनि व्यापारीहरुले नै कब्जा गरेको कारण सर्वसाधारणहरु सवारी हिंड्ने मार्गमै जोखिमपूर्ण यात्रा गर्न बाध्य रहेकाले फुटपाथ खालि गराउने अभियानलाई संवेदनशीलताको अगाडि बढाईएको र आज मात्रै आग्रह गरिने र भोलि शनिबारदेखि समान जफत गरिने बताइएको छ ।

भानु चोकदेखि कदमचोक सडक खण्डमा खालि गराउने क्रममा केहि व्यापारीहरुले फुटपाथ पुर्णतः जाम गरि आफ्नो बाईक साइकल ठेला समेत फुटपाथमै राखिएको अति बेथीतिपूर्ण अवस्था रहेको नगरप्रहरीहरुको कथन रहेको छ । कदमचोकस्थित केहि व्यापारीहरुले सटर हुँदा हुँदै पनि फुटपाथमै आफ्नो समान राखेर विक्री गर्ने गरेको पाइएको छ । यो अभियान निरन्तर रुपमा जारी रहने मेयर मनोज साहले बताए । मेयर मनोज साहका अनुसार यहाँका व्यापारीहरुले अटेरी गरे कानुन बमोजिम कारवाही चलाईनेछ ।

विद्यापति चोक देखि राम चोक, जनक चोक, शिव चोक, भानु चोक लगायतका सडक पेटीहरुमा कतै कतै चियापसल लगायतका पसलहरु नै संचालन भएको छ ।

फुटपाथ कब्जा भएकै कारण सडकमा अनावश्यक ट्राफिक जामको समस्या समेत हुने गरेको प्रहरीहरु बताउँछन् । ट्राफिक प्रहरीहरुलाई समेत नटेर्ने व्यवासायीहरु विरुद्ध जउनपाले कानुनी कारवाही गर्नु पर्ने आवश्यकता हुँदा हुँदै पनि सोबारे कुनै ठोस निर्णय लिन नसक्दा फुटपाथ कब्जा गर्ने व्यवसायीहरुको मनोबल बढेर गएको हो ।

जउनपाले थालेको यो अभियान जनकपुर उद्योग वाणिज्य संघ जनकपुरधाम ,जउनपा,जिल्ला ट्राफिक कार्यालय धनुषा जिरोमाईललगायतका सरोकारवालाहरुले फुटपाथ खालि गराउन ठोस कदम चाल्नु पर्ने अति आवश्यक रहेको देखिएको छ ।

त्यसैगरि नगर क्षेत्रको ठाँउ ठाउँमा अव्यवस्थित पार्किंगले गर्दा समेत नगर क्षेत्र कुरुप मात्र होइन अस्त व्यस्त देखिने गरेको जनगुनासो छ ।