काठमाडौं । प्रधानमन्त्री सुशीला कार्की क्याबिनेटमा २०७९ सालको प्रतिनिधि सभा निर्वाचनमा काठमाडौं–७ बाट स्वतन्त्र उम्मेदवारका रूपमा प्रतिस्पर्धा गरेका जेन–जी नेता किरण केसी नाम अग्रपँक्तिमा रहेको व्यापक चर्चा रहेको छ ।

केसीले संस्कृति, पर्यटन तथा नागरिक उड्डयन मन्त्रालय सम्हाल्नेगरी कार्की नेतृत्वको सरकारमा जान लागेको बताइएको छ ।

अन्तर्राष्ट्रियस्तरको उच्च शिक्षा र पारदर्शी नेतृत्वको क्षमता रहेका नेता केसीले जेनजी पुस्ताको मागअनुसार काम गर्ने विश्वास छ ।

उनले मिटर ब्याजी विरुद्धको जनआन्दोलन, भ्रष्टाचार विरोधी अभियानमा सक्रिय भूमिका निभाएका थिए ।

समाजसेवी र उद्यमीका रूपमा परिचित केसीले नेपालमा पर्यटनको दिगो विकास, युवालाई उद्यमशीलताको मूलधारमा ल्याउने नीति, र सार्वजनिक नेतृत्वमा पारदर्शिता र जवाफदेहिता कायम गर्न निरन्तर आवाज उठाउँदै आएका छन् ।

उनको व्यक्तिगत दृष्टिकोण अनुसार, “नेपालको संस्कृति, पर्यटन र नवप्रवर्तनलाई पारदर्शिता, सृजनशीलता र समावेशितासहित विश्वस्तरमा र्पुयाउनु नै मेरो सपना हो।” यद्यपि मन्त्रिपरिषद्को अन्तिम टुंगो अझै लागेको छैन, राजनीतिक वृत्तमा केसीको नामले चर्चा र उत्साह दुवै सिर्जना गरेको छ ।