जलेश्वर : महोत्तरीका जेनजी तथा स्थानिय अगुवाहरुले प्रादेशिक अस्पताल जलेश्वरको परिसरमा शनिबार बिहान सरसफाई सँगै वृक्षारोपण गरेका छन ।

उनीहरुले प्रादेशिक अस्पताल जलेश्वरले प्रवाह गर्ने न्यूनतम सुविधा सुदृढ़ गर्न देखी अस्पतालको समग्र सुधारका लागि प्रदर्शन गरी विभिन्न माग समेत राख्दै आएका थिए ।

उनीहरुले अस्पतालको सेवा प्रवाह दिनानुदिन गुणस्तरहीन हुँदै गएको भन्दै यसलाई सुधार उन्मुख बनाउन आफुहरुले पहल गर्ने बताएका थिए  ।

शनिबार अस्पताल परिसरमा गरिएको उक्त सर-सफाई तथा वृक्षारोपण कार्यक्रम त्यही परिवर्तनको सुरुवात रहेको जेनजी युवाहरुले बताएका छन।

उनीहरु विभिन्न किसिमका फुल लगायत वृक्षहरु रोपेको जानकारी गराए ।

अस्पतालमा सरसफाई समेत नदेखिएको हुनाले अस्पताल सुधारको कार्य सरसफाई र वृक्षारोपण सँगै सुरु गरिएको युवाहरुले जानकारी दिए ।

प्रादेशिक अस्पताल जलेश्वर यस क्षेत्रकै लागि अपरिहार्य स्वास्थ्य संस्था हो । यसको सबलीकरण र विकासका लागि कुनै समझौता सहन हुँदैन यसप्रति राजनीतिक दल,स्थानिय सरकार र प्रदेश सरकार सुस्त देखिएकोले जेनजी फ्रण्टमा आएर नागरिकको जायज अधिकारको लागि आवाज उठाएको जेनजी महोत्तरी जिल्ला संयोजक रंजित साहले जानकारी दिए ।

उनले ” यस अस्पताललाई रेफर अस्पताल भनेर चिनाउने यहीका जनप्रतिनिधि र सरोकारवाला निकाय हैन भन्दै प्रश्न पनि गरे राजनीतिक सक्रियता र पदले यतिका दिन समम् अस्पताल चलाएका हुन परिवर्तन र सुधार अहिले प्रत्यक्ष सबले अनुभव गरिरहेकै छन त्यसैले यसका सुधारका लागि जेनजी अघि बढेको छ र सकारात्मक परिवर्तन हुन्छ ” संयोजक साहले बताए ।

उक्त सरसफाई तथा वृक्षारोपण कार्यक्रममा जेनजी युवा सँगै स्थानिय,अस्पतालका कर्मचारी तथा प्रहरीको सहभागिता रहेको थियो ।