जनकपुरधाम : बिर्तामोडस्थित एक होटलमा नगरका कर्मचारीले लुकाएको कोरोना भाइरस विरुद्धको भेरोसिल खोपसहित नगरका स्वस्थ्य प्रमुख फेला परेका छन् । शुक्रबार बिर्तामोडस्थित होटल टाएमलेस मोमेन्टमा लुकाएको खोपसहित नगरका जनस्वास्थ्य प्रमुख ओम खड्का फेला परेका हुन् ।
कोरोना विरुद्धको खोप मापदण्ड विपरीत आफू निकटलाई मात्र दिने गरेको गुनासो भइरहेका बेला लुकाएर राखिएको खोप र बिर्तामोड नगरका जनस्वास्थ्य प्रमुखलाई स्थानीय युवाले अपरान्न ४ बजे फेला पारेका हुन् ।
विगत केही दिनयता जनस्वास्थ्य प्रमुख ओम खड्काले होटलमा नजिकका व्यक्तिलाई बोलाएर खोप लगाउने गरेको जानकारीमा आएको छ । होटेलको दराजमा लुकाएर राखिएको अवस्थामा खोप फेला परेपछि खड्काले सिलबन्दी कार्टुन फोडेर खोप अन्यन्त्रै लुकाएका थिए । तर, स्थानीय केही युवालाई शंका लागि खोजी गर्दा होटलको र्याकमा उक्त खोपको कार्टुन फेला परेको हो । खोपसहित जनस्वास्थ्य प्रमुखलाई युवाहरुले होटलमा फेला पारेपछि प्रहरी टोली समेत घटनास्थलमा पुगेको थियो ।
खड्काले भने आफू होटेलमा नै क्वारेन्टाईनमा रहेकाले खोप ल्याइएको दाबी गर्दै आफ्नो बचाउ गरेका छन् तर होटलको अभिलेखमा भने खड्का आज मात्रै इन्ट्री भएको पाइएको छ ।
खड्कामाथि यस अघि पनि खोप लुकाएर प्रतिव्यक्ति १० हजार रुपैयाँ असुलेर बिक्री गर्ने गरेको आरोप लाग्दै आएको थियो । बिर्तामोडमै औषधिको होलसेल पसल समेत गर्दै आएका खड्काले कोरोना संक्रमण शुरू भएयता आफ्नै फर्ममा लाखौं मूल्यका सामाग्री नियमविपरीत नगरपालिकालाई बिक्री गरी अनियमीतता समेत गर्दै आएको स्थानीयको आरोप छ ।
झापाका प्रमुख जिल्ला अधिकारी श्रवण कुमार तिमल्सिनाले प्रहरीले खोप बरामद गरिसकेको र सो विषयमा छानविन थालिएको बताउनुभएको छ । जनता समाचारबाट
Discussion about this post