सप्तरी –सप्तरी क्षेत्र नम्बर ४ (ख) का स्वतन्त्र उम्मेद्वार अनिरुद्व सिंह यादवले मतदातासँगको अन्तरकृयालाई निरन्तरता दिएका छन् ।

यादवले शुक्रबार बोदे बर्साईन नगरपालिका वडा नम्बर ९ र बलान बिहुल गाउँपालिकाको वडा का मतदातालाई भेट गरेर आफ्ना एजेण्डा राख्दै आउदो निर्वाचनमा सहयोग गर्न आग्रह गरेका छन् ।

मतदाताहरुले अब स्वतन्त्रलाई नै अघि सार्ने भन्दै योग्य, सक्षम उम्मेद्वार सिंह बाहेक अन्य नदेखिएकाले उनकै पक्षमा मतदान गर्ने प्रतिकृया दिए ।

स्थानीय कामेश्वर यादवले दलीय उम्मेद्वारका साथै केही स्वतन्त्र भन्दै हिँडेका उम्मेद्वारबाट क्षेत्रको समग्र विकास हुन नसक्ने आफूले देखेको भन्दै त्यसका लागि सिंह एक मात्रै विकल्प रहेको बताए ।

उनले भने, ‘पहिले जितेर गएकाह?को काम पनि हामीले हेरिसकेका छौँ, उनको भुलभुलैया गफमा हामी पर्दैनौँ, तपाईलाई जिताउने अभियानमा हामी सँगसँगै हिँड्न तयार छौँ ।’

रोड, नाला भन्ने कुरा विकासको चरणमा हुँदै जाने कुरा भएको भन्दै उनले समग्र विकासका कुरा गर्ने उम्मेद्वार सिंह मात्रै देखेकाले सबैले उनलाई साथ दिनुपर्ने बताए ।

‘रोड, नाला जस्ता भौतिक निर्माण भन्ने कुरा त विकासको चरणमा हुँदै जाने कुरा हो, तर त्यस ठाउँको शिक्षा, स्वास्थ्य तथा स्वरोजगारको सवालमा के काम भयो त भन्ने कुरा महत्वपूर्ण हो,’ उनले भने, ‘यो समग्र विकासको एजेण्डासहित आएका उम्मेद्वार सिंहलको पक्षमा सबैले मतदान गरौँ ।’

स्थानीय मतदाताको सुझाव र सल्लाह बमोजिम नै आफू अघि बढ्ने भन्दै उम्मेद्वार सिंहले त्यसका लागि अहिले चुनावमा साथ दिएर सहयोग गर्न सबैलाई आह्वान गरे ।