जनकपुरधाम : लोकतान्त्रिक समाजवादी पार्टी (लोसपा) नेपालका अध्यक्ष महन्थ ठाकुरले मधेस प्रदेशको मुख्यमन्त्रीमा लोसपाको स्वाभाविक दाबी रहेको बताएका छन् ।

आज जनकपुरधामस्थित मधेस प्रदेशको पार्टी कार्यालयमा कार्यकर्ताहरुलाई सम्बोधन गर्दै ठाकुरले भने, ‘उपेन्द्रजीको बाराको चुनावअगाडि नै लोसपालाई मधेशको नेतृत्व दिने तत्कालीन सत्ताघटकको सर्वपक्षीय सहमति भएको हो ।’

उनले आफूहरु पर्ख र हेरको मनस्थितिमा रहेको उल्लेख गरे । उनले बाराको निर्वाचनमा जितेन्द्र सोनलको अगुवाइमा लोसपालाई प्रयोग गरेर उपेन्द्र यादवले पछि देउवा र प्रचण्डकै अगाडि लोसपाले धोका दियो भनेर बोल्दा देउवा र प्रचण्ड रिसाएको पनि बताए ।

कूल १०७ सदस्यीय मधेश प्रदेशसभामा हाल १०५ जना सदस्य कायम छ । मधेशमा नेपाल कम्युनिष्ट पार्टी (एमाले) का एक निलम्वितसहित २५, नेपाली कांग्रेसका २२, जनता समाजवादी पार्टी नेपालका १९, जनमत पार्टीका १३, माओवादी केन्द्रका ९, लोकतान्त्रिक समाजवादी पार्टी, नेपालका एक निलम्वितसहित ९, नेकपा (एकीकृत समाजवादी) पार्टीका ७ तथा राप्रपा, नागरिक उन्मुक्ति पार्टी र सङ्घीय समाजवादी पार्टीका १÷१ जना प्रदेशसभा सदस्य छन् ।

मधेशका मुख्यमन्त्री सतिश कुमार सिंहले आज पदबाट राजीनामा दिइसकेका छन् । यता मधेशमा १९ सिट रहेको जसपा नेपाल भने कांग्रेस–एमाले इतरको गठबन्धनबाट सरकार बनाउने पक्षमा छ ।