• राजेन्द्र कुमार ठाकुर

जनकपुरधाम । धनुषाको शहिदनगर नगरपालिकाका मेयर उदय कुमार बरबरिया (यादव) ले आफ्नो नगरवासीको स्वास्थ्यप्रति सधैं प्रतिवद्ध रहने प्रतिवद्धता जाहेर गरेका छन् ।

शहिदनगर नगरपालिकाको वडा नं. ३ स्थित रहेको यदुकूहा आयुर्वेद औषधालयमा चलेको ३ दिने खोज तथा उद्धार र प्राथमिक उपचार सम्बन्धी तालिमको समापन कार्यक्रममा बोल्दै मेयर बरबरियाले शहिदनगरवासीको स्वास्थ्यको मामिलामा कुनै कम्प्रोमाईज नहुने बताए ।

उनले कोरोना कालमा देशव्यापाी लकडाउनको बेला पनि नगरका जेष्ठ नागरिक तथा दीर्घरोगीहरुको लागि निःशुल्क औषधी ल्याइदिएको स्मरण गराउँदै नगरपालिका स्वास्थ्य क्षेत्रमा धनी भएकोले नगरवासीको स्वास्थ्यसँग कुनै सम्झौता नहुने जीकिर गरे ।

समाजिक सँस्था लाईफ नेपाल, यूनिसेफ र रेडक्रसको सहजीकरणमा भएको तालिममा लाईफ नेपालका अध्यक्ष सुरैत ठाकुरको अध्यक्षता तथा मेयर बरबरियाको प्रमुख आतिथ्यमा सम्पन्न भएको सो तालिममा उनले प्राथमिकत स्वास्थ्य केन्द्र यदुकुहामा यथाशिघ्र नै ईमरजेन्सी सेवा सुचारु गर्नेप्रति पुनः ध्यानाकर्षण गराए ।

सो कार्यक्रममा लाईफ नेपालका अध्यक्ष सुरैत ठाकुरले शहिदनगरको हरेक वडामा स्वास्थ्य सँस्था भएकोले यहाँको नगरवासी स्वास्थ्य दृष्टिकोणले धनी रहेको उल्लेख गरे । उनले स्वास्थ्यको लागि नगरपालिका र नगरपालिकाको लागि स्वास्थ्य मन्त्रलाई अवलम्बन गरिएको बताए ।

तालिमको समापन कार्यक्रममा नगर उप प्रमुख शिला देवि कापर, युनिसेफका प्रतिनीधि अशोक झा , रेडक्रसका लालबाबु हाथी, खगेन्द्र सिंह, राजकुमार मंडल, आकाश कार्कि सहित कमला अभियन्ता विक्रम यादव , ईलाका प्रहरी कार्यालय यदुकूहाका प्रहरी नीरिक्षक सँबीत भण्डारी, सशस्त्र प्रहरी बल यदुकूहाका ईन्स्पेक्टर तथा तालिमकर्ताहरुको सहभागीता रहेको थियो ।