काठमाडौं । च्याम्पियन्स लिग फुटबलमा म्यान्चेष्टर युनाईटेडले शानदार जित हात पारेको छ । मार्कुस रासफोर्डले ह्याट्रिकमा म्यान्चेष्टर युनाईटेडले आरबी लाइपजिगलाई पराजित गरेको हो ।
बुधबार राति भएको समूह एचको खेलमा युनाईटेडले लाइपजिगलाई ५–० ले पराजित गरेको हो । इंग्ल्यान्डका अन्तराष्ट्रिय खेलाडी रासफोर्डले मैदान छिरेको १६ मिनेटमा ह्याट्रिक पुरा गरेका थिए ।
मासन ग्रिनउडले प्रतियोगितामा पहिलो गोल गरे । दोस्रो हाफमा मैदान छिरेका रासफोर्डले ७४ औं मिनेटमा पहिलो गोल गरे । त्यसको चार मिनेटपछि उनैले युनाईटेडका लागि तेस्रो गोल गरे ।
खेल सकिन ३ मिनेट बाँकी छदाँ एन्थोनी मार्सियलले पेनाल्टीमा गोल गर्दै युनाईटेडलाई ४–० को सहज अवस्थामा पुर्याएका थिए । इन्जुरी समयमा रासफोर्डले ह्याट्रिक पुरा गर्दै युनाईटेडलाई ५–० को शानदार जित दिलाए ।
युनाईटेड ६ अंक सहित समूहको शीर्ष स्थानमा छ । दोस्रो स्थानको पीएसजीको ३ अंक छ । लाइपजिग ३ अंक बटुल्दै तेस्रो स्थानमा छ । इस्तान्बुल बासाकेशिर अंक विहिन हुँदै पुछारमा छ ।
प्रतिक्रिया!!
सम्बन्धित खबर
